Considérome unha persoa con bastante curiosidade e, aínda que non se limita a un único campo, creo que foi iso o que me levou a sentir interese pola investigación, especialmente no ámbito da biomedicina. Con iso en mente, estudei Biotecnoloxía (Biotecnología) na USC, e continuei os meus estudos cun máster en Nanociencia e Nanotecnoloxía (Nanociencia y Nanotecnología) na mesma universidade. Gustaríame poder aplicar eses coñecementos para poder mellorar a vida e o benestar das persoas; é por iso que sinto especial interese nas terapias dirixidas e a medicina personalizada, xa que permiten desenvolver tratamentos contra certas patoloxías que sexan á vez máis eficaces e máis seguros. Co meu traballo, busco xerar un impacto real na sociedade e no benestar da xente.

Ademais do eido da investigación, chámame a atención a divulgación científica, xa que me parece fundamental para a transmisión de coñecementos, tanto á xente de dentro como de fóra do campo da ciencia. Encantaríame poder colaborar nalgún momento con proxectos de divulgación ou mesmo desenvolver os meus propios. Foi esta inquedanza a que me fixo iniciar o proxecto dun blog de divulgación en galego, chamado “Feiticiencia” (que aínda se atopa nas súas fases iniciais).

Máis alá do meu campo, sinto paixón pola escritura. Gústame planificar e escribir historias e novelas en lingua galega, o que potencia a miña creatividade, a miña expresión escrita e o dominio da miña lingua, pola que sinto moito aprecio. Ademais, tanto a escritura como a miña personalidade introvertida e observadora servíronme para desenvolver a miña empatía e intelixencia emocional, o que me permite traballar nun ambiente de bo compañeirismo con outras persoas.