Karolo
Rapper and Writer in 10th of Ramadan City, Egypt
المعلومات الحياتية :
أنا إسمي أحمد عماد الدين أبوزيد من مواليد ١٢-٥-١٩٩٦ .. مولود في مدينة الرياض بالسعودية و عشت في الرياض و درست فيها لمدة ٩ سنين و آخر سنة ليا هناك كانت ٢٠١٤ .. أنا حاليا عايش في مصر في مدينة العاشر من رمضان و
طالب في كلية تجارة إنجليزي بجامعة عين شمس .
مشواري مع فن الراب :
من و أنا في ٥ إبتدائي و أنا مهتم بالراب و كنت بسمع رابرز كتير بس من خارج مصر كنت بسمع ( Eminem - Dr.Dre - N.W.A - RedMan - Methodman - Biggie .... etc) و الرابرز دول قدمولي فرصة كبيرة إني أفهم الراب صح و أتعلم منهم صح بعيد عن وحل الراب المصري اللي ٩٠% منه بيتقدم غلط .. و مع الوقت بدأت أتعلم أغني راب لوحدي و أكتب لوحدي و مع الوقت قابلت زميل و صاحب و أخ ليا إسمه "عمر طارق" و الصدفة البحتة جمعتنا سوا في الراب سنة ٢٠١٠ و بدأنا نراب مع بعض بكل طفولية و عملت معاه أول أغنية متسجلة بس طبعا لا وجود لها دلوقتي إلا في الذاكرة بس
و الحمد لله أسست أول باند ليا مع واحد صاحبي و أخ ليا بردو إسمه "محمد إبراهيم" و أسسنا باند بعنوان "راب سكيلز" سنة 2011 و عملنا أول ميني ألبوم مع بعض بس طبعا كان ألبوم تعبان عشان كان لسة مستوانا قليل و بمرور السنين غيرنا إسم الباند لإسم "هارد فلو" ليدل على التيار الصعب في أداء الراب و بدأ مستوانا يتحسن مع الوقت و نزلنا أغاني كويسة الحمد لله .. و في سنة 2013 حصلي صدمة في حياتي الشخصية بس الصدمة دي كان تأثيرها الإيجابي عليا إني أقرر أبقى مختلف و مميز و قدم الكلمات و الإسلوب اللي عقلي مقتنع بيه و مصدقه بدون الإستماع لأي رأي و بدون إني أمشي مع قطيع الراب المصري اللي ماشي دلوقتي و بالفعل بدأت خطوة الإختلاف بتراك "دائرة الإنعزال" اللي إختلفت فيه طريقة كتابتي بدرجة كبيرة جدا عن سنين فاتت و توالت الأغاني المختلفة و قدمت أغنية "إختفت الملامح" اللي حققت أكبر نجاح أنا نجحته من ٤ سنين شغل و إجتهاد و الأغنية دي مكنش ليها معنى ثابت بنسبة ١٠٠% انا قدمتها بحيث إن اللي يسمعها هيفهمها على حسب تفكيره و شعوره و إسم الأغنية الأصلي "إختفت ملامح الأغنية دي" بس سبت المعنى مجهول عشان اللي يسمعها يفهمها بشعوره ... و قدمت أغنية "رد فعل" اللي تعتبر بنسبالي أغنية شخصية أكتر منها عامة بالإضافة لسلسلة "لغز الواقع" اللي بتميل بشكل كبير جدا إلى التفكير فيما وراء الخيال و الحياة و تشخيص الحياة في شكل ألغاز حلها مجهول و مندرج تحت معنى التوهان و قدمت منها جزئين لحد دلوقتي أول جزء كان في يوم ١/٩/٢٠١٢ و تاني جزء كان في ١/٩/٢٠١٤ ....
دا كان مجرد موجز عن مشواري و بعض أعمالي اللي قدمتها بمجهوداتي الشخصية .
يعني إيه Karolo : إسم مالوش معنى بس كل حرف فيه إختصار لحاجة معينة في حياتي.
الخلاصة :
أنا بحاول أقدم اللي أنت عايز تقوله بس بصوتي أنا .. يعني أنا بحاول أبقى أنت عشان أحس بصرختك و أقدر أعبر عن اللي انت مش قادر تعبر عنه