Mohands Momkn

مهندس ممكن
مش بمعنى انه ممكن يكون مهندس و ممكن يكون سوّاق تاكسى، المعنى من مهندس ممكن يعنى مُهندس مبدأه الوحيد فى الحياة ودستوره الأوحد، أغنية ممكن للملك محمد منير طبعاً الكلام مش أى حد هيستوعبه إلا إذا كان مُنيريان قديم فاهم المقصود من ورا الكلام. . مهندس ممكن يعنى تهمه الفرحة لو تمنها حياته بعد كدة، يعنى فعلاً مش هعرف اوصّل المعنى للى مش فاهمين قصدى بس أكيد المنيريانز اللى بيقروا الكلام دة دلوقتى فاهمين انا قصدى ايه. . . ف نهاية المقدمة هسأل سؤال اللى مش هيفهمه ما يقولش انه فهم الكلام اللى فات. . اشمعنى المعنى بيعرفنى لو باتت ف قلوبنا جراح، ممكن !!

مهندس ممكن، شاب عشرينى السن، خمسينى الهوى، زمالكاوى جدا، بيدرس هندسة وقريب ان شاء المولى يتخرج من هندسة. . عشان يلبس خازوق اكبر اللى هو الجيش، بستمتع بالحياة بشكل كويس وحاجات كتيرة بتفرّحنى زى سيجارة تحت المطر او مكالمة تيليفون من واحد غايب بقاله فترة، مرتبط ببنت هى كل حياتى، منير بالنسبة لى مش مجرد مطرب صوته حلو واحساسه عالى، لأ دة الأب الروحى بالنسبة لى اللى علمنى افرح وافرح إزاى، وعرّفنى ايه الحاجات اللى ممكن تزعلنى وازعل إزاى واكسر زعلى إزاى. . اشمعنى المعنى بيعرفنى.

ليا معارف بتلخبط ف اساميهم، بس صحابى مش كتير. . مش معنى الكلام دة انى بسمح لأى حد انه يدخل حياتى تحت مسمى المعرفة، الناس معارف على اساس ان ممكن ف يوم يكونوا صحاب، لكن اللى م الاول مش حاسس فيهم انهم ينفعوا صُحاب مش هقول بطردهم برة حياتى لأنى ببساطة ما بسمحلهمش بالدخول

ف الاخر حياتك ملكك وحياتى ملكى، ليك الحق تسألنى عملت ايه ف الموقف الفلانى للمعرفة، لكن نهارك اسود لو سألتنى ليه، ليك الحق انك تعرف، بس ملكش الحق انك تعدّل عليا. .