Nesma Zaki
نسمة فتوح..آه بكتب بالعربي عادي و ده لا يعني اني مش بعرف أكتب فرانكو أو انجليزي بس أنا لو قررت أتكلم في موضوع اللغات ده هتتعقدوا
للآسف بدرس صيدلة في جامعة القاهرة و ربنا ما يكتب عليّا اني أشتغل في أي حاجة متعلقة بالدراسة دي
كان ممكن أكون في حتة تانية خالص و شكل مستقبلي مختلف بس أنا بسمع الكلام عشان أنا مؤدبة و كده
أكتر لون بحبه الرمادي و ده لا يعني اني متذبذبة و متردده و جو الفقع بتاع الأبراج
ده بحب اللون ده و خلاص
شخص يدعي انه حاسم و يحاول الوصول للأفضل ولا بعند ولا بتعصب بسهولة بس لسلامتك وسلامة كرامتك ماتحاولش تستفزني أو تطنطط عليّا عشان هكرهك في عيشتك
أول انطباع بيتاخد عني اني تنكة و مغرورة او بتكسف في حين ان أنا لا كده ولا كده أنا بس ماعرفكش فبالتالي مش أول كلام بيننا يبقى يا مان و يا برنس و يا عسولة و كده
بكلم البنات على انهم ولاد عشان ينشفوا و يبطلوا مياصة و بكره اي فيمينيست و أحسن صحاب صحاب المدرسة
مش رغاية و بكره تامر حسني و بسمع جاستن بيبر و التفاهة مالهاش قوالب عشان الناس تتحط فيها
بحب القراءة جدا رغم اني مش بقرأ كتير و بأحب الشعر جدا بس ساعات بشوفه سهوكة و ماعنديش مشكلة مع حد قد مُدعي الثقافة و مُدعي خفة الدم
أكتر ناس بحترمها اللي بتقول مش عارفة و هي مش مكسوفة
مقتنعة ان التحضر مش ان لسانك يبقى نضيف او ماتشتمش بالعكس التحضر انك تلتزم بمواعيدك و تحترم شغلك و ماتفش في الأرض و انك تبقى مقتنع ان تحت الكوبري مش حمام بيتكوا
أرض اللواء مش المهندسين و كوزيكا مش المعادي و مامي اصولها مش تركية