( @zekwaz )
cairo - egypt
( @zekwaz )
cairo - egypt
في الحقيقه انا مش عارف ابدأ منين بس انا سعيد جدا انك جيت هنا بصراحه .. ممكن تكون جاي هنا تعرف عني اكتر او تكون جيت هنا غلط او ممكن تكون مجرد ضحيه للفضول عموما لو عايز تعرف اهلا وسهلا مش عايز نورتنا وشرفتنا وياريت تكررها تاني ... بص يا سيدي انا انسان عادي من مواليد برج الاسد .. تسعيناتي جدا طبيعي لاقصي درجه لسه بدور علي احلامي علشان احققها ولسه مش لاقي هدف محدد ليا وحاسس اني تايهه في كوكب الارض ومش عارف جيت هنا ازاي اكتر حاجه بعملها في حياتي اني افكر .. افكر قبل ما اتكلم افكر قبل ما ابص ولو اقدر افكر قبل ما افكر هاعملها بفكر في كل حاجة واي حاجه سوا مفيده او تافهه كبيره او صغيره مهمه او مش مهمة .. ليا تجارب كتير فاشله في حجات كتير نجح فيها غيري .. جوايا افكار كتير لو طلعتها اكيد هاتغير الكون بس انا محتاج افتكرها الاول علشان بتجيلي 1000 فكره في الدقيقه و بنساهم في الدقيقه الي بعديها ... عندي كلام كتير اوي لو طلعته يملي مجلدات بس لسه بتعلم الكلام علشان كدة تلاقيني ديما بشاور .. مؤمن ان ربنا خلقلنا اتنين ودان علشان نسمع اكتر و اتنين عنين علشان نشوف اكتر ولسان واحد علشان نتكلم اقل وعقل كبير علشان نستخدمه في اننا نفكر في الي شوفناه وسمعناه كويس .. .. اكتر حاجة فشلت فيها اني ابقي صبور وخلقي واسع .. عندي ناس كتير اوي عايشين جوايا علشان كدة لما تشوفني بكلم نفسي ماتتخضش ... مبحبش السياسه بس هي بتجري ورايا ديما وبحب البلد دي بس هي بتكرهني ديما بحب نفسي لدرجة اني بقيت بكرهها و بكره الناس لدرجة اني بقيت بحبهم وبحب واحدة عمرها ماحبتني مابتحبنيش وبردو مش هابطل احبها .. ديما بتوقع الاسواء علشان مااتصدمش في الاخر ... بحب رفعت اسماعيل زي ابويا الروحي وبحب شلبي سلويفان زي قريني الي ماعرفتش ابقي شبهه وبحب هومر سيمسون كده من غير سبب